من اشعار بنت الرياااااااااااض

ما تغيَّر شي .. لكن .. صار فاضـي هالمكـان
يعني إنتَ شفت قلبي! طحت مِنْ عينـي وعينـه

كان لك قلبي مدينه ولاحظ إني قلت : { كـان }
يعني إنتَ الحين واحد { خارج حدود المدينـه }

ليه مستغرب كلامي وليـه أعطيـك الأمـان ..!
وليه تَكْذِب في كلامك العـذر وينـك ووينـه ..!

ما ألومك كـان قلبـك ثـارت أمواجـه وخـان
الخطا منَّي لأني صـرت فـي بحـرك سفينـه

والسؤال اللَّي كتمته ومـا نِطَـق فيـه اللسـان
كيف إيدك إطعنتنـي وآنـا أحْسِبْهَـا أمينـه ..!

جرحي ما يرضيه قلبك لـو يجـي كلِّـه حنـان
لو تبوس الجـرح فينـي ولـو تقبلهـا إيدينـه

يُوم أحبك قلت كلمه : { يكرَم المرء أو يُهـان }
وإنتَ قلبي ما كرمته ومـا قـدرت إنِّـك تهينـه

{ عزِّتي } .. ما هي جديده آنا شامخٍ من زمـان
إغسل إيدك من رجوعي وروح يا إبـن اللذينـه

طاب خاطر قلبي منِّك وهـذي الفرقـى رهـان
وحتَّى لو قلبـي يحبـك ربِّـي بفراقـك يعينـه

تدري لما قلت أحبك قلت ومـا عنـدي ضمـان
وإختياري كان خاطىء .. تجربه بالحيل شينـه

كنت تخطي وكنت أسامح مرَّه مرتيـن وثمـان
أدمح الزلـه عشانـك وأكتـم أنفـاس الغبينـه

كنت أحبك وكنت أعـزك والغـلا فينـي جبـان
اخاف تزعل لو ألومك ضعت مـا بينـك وبينـه

في عيون الناس عادي بس فـي عينـي جنـان
وكان قلبي من يشوفك تفضحـه نظـرة حنينـه

ماني أوَّل من يحب ومنتَ آخر شخـص خـان
المحبه في زمانـك بحرهـا مـن غيـر مينـه

الفشـل .. كـان النتيجـه وأعتـقـد آن الأوان
ببني مستقبل حياتـي وأنسـى قصتنـا الحزينـه

وخطوتي الأولى غيابـك وراح أطبقهـا عشـان
يبكي قلبك لا فقدنـي والنـدم .. يملـي سنينـه

جاي تسأل عن مكانك ..! هو بقى فيني مكان ..!
الله يرحمها المشاعر اللـي كانـت لـك رهينـه

قلت لك قلبي { مدينه } فيها لك حشمـه وشـان
لكن إنتَ الحين أغرب شخص في هذي المدينـه

شكراً على المرور ياااا صقر العراق الذي نور صفحتي